निवडणुकांच्या प्रचाराला सुरूवात होताच महायुतीतील बेबनाव आला समोर

Maharashtra Assembly Election 2024 : रायगड जिल्ह्यात महायुतीत काही आलबेल नसल्याचे पाहायला मिळत आहे. कारण शिवसेना शिंदे गटाचे आमदार महेंद्र थोरवे यांनी राष्ट्रवादीचे प्रदेशाध्यक्ष सुनील तटकरे यांच्यावर गंभीर आरोप केले. तर तटकरे हे महायुतीला लागलेला कॅन्सर आहे, अशा शब्दात जहरी टीका केली. थोरवे यांनी पत्रकार परिषद घेऊन जोरदार निशाणा साधला. 

रायगड जिल्ह्यातील महायुतीत जागावाटपावरून वाद झाला. कर्जत खालापूर विधानसभा मतदारसंघ शिवसेना (एकनाथ शिंदे) कडे गेला आहे. या मतदारसंघातून महेंद्र थोरवे यांना उमेदवारी देण्यात आली आहे. परंतु, त्यांच्याविरोधात अपक्ष उमेदवार सुधाकर घारे यांचं आव्हान असल्याचे सांगितले जात आहे. कारण, सुधाकर घारे अपक्ष लढणार असले तरीही त्यांना सुनील तटकरेंचं मोठं पाठबळ असल्याचा आरोप महेंद्र थोरवे यांनी स्वत: केला.  

सुनील घारेंना तटकरेंचे अभय

आमदार महेंद्र थोरवे म्हणाले की, राष्ट्रवादीचे उमेदवार सुधाकर घारे यांना सुनील तटकरेंचं अभय आहे. सुनील तटकरेंच्या आशीर्वादामुळेच ते अपक्ष उमेदवार म्हणून या मतदारसंघात निवडणूक लढवत आहेत. महायुतीत असतानाही सुनील तटकरे यांनी जाणीवपूर्वक केलेलं कृत्य आहे. त्यामुळे मी हे इतरांच्या निदर्शनास आणून देत आहे. महायुतीचं सरकार आणण्याकरता तिन्ही पक्षाचे नेते प्रयत्न करत आहेत, त्या प्रयत्नांवर पाणी फेरण्याचं काम सुनील तटकरे करु लागले आहेत. महायुतीला लागलेला कॅन्सर म्हणजे सुनील तटकरे आहे, असे एकनाथ शिंदे यांच्या शिवसेनेचे आमदार महेंद्र थोरवे म्हणाले.