Maharashtra Assembly Election 2024 : महाराष्ट्र विधानसभा निवडणुकीत आता दिवसेंदिवस रगत चढत चाललेली आहे. यंदाची निवडणुक जो कोणी उमेदवार निवडून येणार त्याचे नशीबच बलवत्तर अशी चर्चा देखील राजकीय वर्तुळात सुरू आहे. त्याचे कारण देखील तसेच आहे. प्रमुख सहा पक्ष, दोन आघाड्या अन् अपक्ष उमेदवारांची संख्या पाहता, यंदाची लढाई ही कोणत्याही उमेदवाराला सोपी नाही.
सोमवारी अर्थात 4 नोव्हेंबर रोजी तीन वाजता अर्ज मागे घेण्याची मुदत संपली आहे. अशा परिस्थितीत महाराष्ट्र विधानसभेच्या 288 जागांसाठी आता राज्यभरात किती उमेदवार मैदानात उतरलेले आहेत. तर किती जणांनी आज दिवसभरात अर्ज माघारी घेतले याची आकडेवारी समोर आली आहे.
.jpeg)
8,272 उमेदवार मैदानात
निवडणूक आयोगाकडून दिलेल्या माहितीनुसार, महाराष्ट्रातील विधानसभा निवडणुकीसाठी यावेळी एकूण १०,९०० उमेदवारांनी अर्ज दाखल केले होते. त्यापैकी १६५४ उमेदवारांचे अर्ज फेटाळण्यात आले, तर ९२६० उमेदवारी अर्ज स्वीकारण्यात आले. त्यापैकी ९८३ उमेदवारांनी अर्ज मागे घेतले. या सर्व प्रकारानंतर आता ८२७२ उमेदवार उरले असून २० नोव्हेंबरला कोणाच्या भवितव्याचा फैसला ईव्हीएममध्ये होणार आहे, याकडे सर्वांचे लक्ष लागून आहे.
मविआ-महायुतीचे नेते अडचणीत
20 नोव्हेंबरला महाराष्ट्रातील सर्व 288 विधानसभा जागांवर मतदान होणार आहे, तर त्याचा निकाल 23 नोव्हेंबरला जाहीर होणार आहे. याबाबत सोमवारी उमेदवारी अर्ज मागे घेण्याची मुदत संपली. महाराष्ट्रात विधानसभा निवडणुकीची रणधुमाळी सुरू झाली आहे. तर दुसरीकडे महायुती आणि महाविकास आघाडीतील बंडखोर उमेदवारांची नाराजी दूर करण्याचे प्रयत्न सुरू होते. त्याचबरोबर काही बंडखोर उमेदवारही अगम्य झाले आहेत. त्यामुळे महाविकास आघाडी आणि महायुतीचे नेते चांगलेच अडचणीत आले आहेत. यात काहींनी अर्ज मागे घेतले तर काहींनी कायम ठेवले आहेत. यामुळे दोन्ही आघाड्यांसमोर आव्हान उभे राहिलं आहे.
