MVA Manifesto : महाविकास आघाडीचा जाहीरनामा प्रसिद्ध, दिल्या 5 गॅरंटी

भाजपने आपला जाहीरनामा आज सकाळी प्रसिद्ध केला. त्यानंतर आता महाविकास आघाडी देखील जाहीरनामा प्रसिद्ध करत आहे. काँग्रेसचे अध्यक्ष मल्लिकार्जुन खरगे यांच्या हस्ते जाहीरनामा प्रसिद्ध करण्यात आला.

यामध्ये महिला, शेतकरी, युवक शिक्षण, आरोग्य, उद्योग, व्यवसाय, सामाजिक न्याय या महत्त्वाच्या विषयांवर लक्ष केंद्रित करण्यात आले आहे. महाविकास आघाडीने आपल्या जाहीरनाम्यात 100 दिवसांचा अजेंडा जाहीर केला. महायुतीने आमच्याच योजना कॉपी केल्या, असा आरोप काँग्रेसचे अध्यक्ष मल्लिकार्जुन खरगे यांनी केला.

काँग्रेसचे पंचसूत्री

कुटुंब रक्षणासाठी विमा – कुटुंबाला 25 लाख रुपयांपर्यंतचा आरोग्य विमा.

महालक्ष्मी योजना – महिलांना दर महिन्याला 3 हजार रुपये आणि महिला व मुलींसाठी मोफत बस सेवा.

कृषी समृद्धी – शेतकऱ्यांचे 3 लाख रुपयांपर्यंतचे कर्ज माफ. नियमित कर्जफेड करणाऱ्या शेतकऱ्यांना 50 हजार रुपयांचे प्रोत्साहन

युवकांना मदत – बेरोजगार तरुणांना दर महिन्याला 4 हजार रुपयांपर्यंतची मदत.

समानतेची हमी – जातनिहाय जनगणना आणि आरक्षणाची 50 टक्क्यांची मर्यादा हटवणार.

या केल्या घोषणा

काय म्हणाले मल्लिकार्जुन खरगे?

मल्लिकार्जुन खरगे म्हणाले, महायुतीने आमच्याच योजना कॉपी केल्या आहेत. महाविकास आघाडीचे सरकार आल्यानंतर महाराष्ट्रात जातीनिहाय जनगणना केली जाईल. कालपासून तेलंगाणात जातिनिहाय जनगणना सुरू झाली आहे. मोदी म्हणाले विरोधक जातीजाती वाद लावत आहेत. पण ही जातीनिहाय जनगणना जातीजातींमध्ये फूट पाडण्यासाठी गणना नसून, कोणत्या जातीत किती लोक मागासलेले आहे, याबाबत माहिती जाणून घेण्यासाठी आहे.

महिलांवरील अत्याचारात महाराष्ट्रात दुसऱ्या क्रमांकावर आहे. महिलांच्या सुरक्षेसाठी शक्ती कायद्याची अंमलबजावणी करणार आहोत. उद्योग आणि रोजगार निर्मितीसाठी नवीन औद्यागिक धोरण आखले जाईल. दादर येथील चैत्यभूमीत डॉ. बाबासाहेब आंबेडकरांचे स्मारक बांधणे ही आमची प्राथमिक पसंती राहील, असेही खरगे म्हणाले.