कडक सुरक्षेत सलमान खानने सुरू केली 'सिकंदर'ची शूटींग

हैदराबाद :  सलमान खानला वाढत्या धमक्यांनंतर त्याची सुरक्षा व्यवस्था आणखी मजबूत करण्यात आली आहे. सलमान खानने हैदराबादमध्ये त्याच्या आगामी सिकंदर या चित्रपटाचे शूटिंग पुन्हा सुरू केले आहे. लॉरेन्स टोळीकडून अभिनेत्याला अनेकदा जीवे मारण्याच्या धमक्या आल्या आहेत, त्यामुळे त्याची सुरक्षा वाढवण्यात आली आहे.

आता सलमान चार स्तरीय सुरक्षेत काम करत असून त्याच्यासोबत 50 ते 70 सुरक्षा कर्मचाऱ्यांची टीम सदैव हजर असेल. हैदराबादमधील प्रसिद्ध फलकनुमा पॅलेस हॉटेलमध्ये सलमानच्या सिकंदर चित्रपटाचे शूटिंग सुरू आहे.

सलमानची सुरक्षा कशी वाढवली?
सलमानला मिळालेल्या सरकारी सुरक्षेत एनएसजी कमांडो आणि पोलिसांचा समावेश आहे. सूत्रांनी दिलेल्या माहितीनुसार, सलमानच्या सुरक्षेसाठी चार स्तरीय सुरक्षा व्यवस्था करण्यात आली आहे. यात त्याचे वैयक्तिक सुरक्षा कर्मचारी, जे निमलष्करी दलाचे माजी सैनिक आहेत आणि त्याचा अंगरक्षक शेराच्या टीमचाही समावेश आहे. याशिवाय हैदराबाद आणि मुंबई पोलिसांकडूनही त्याला सुरक्षा पुरवली जात आहे. सलमानसोबत एकूण 50 ते 70 सुरक्षा कर्मचाऱ्यांची टीम असते, जी त्याला सदैव घेरून असते. 

रश्मिका मंदान्नासोबत गाण्याचे शूटिंग

सलमान खान त्याच्या आगामी प्रोजेक्टसाठी रश्मिका मंदान्नासोबत गाणे शूट करण्यासाठी हैदराबादमध्ये आहे. 58 वर्षीय सलमान महिनाभराच्या शेड्युलवर आहे जिथे तो रश्मिका मंदान्नासोबत दोन खास गाण्यांचे शूटिंग करत आहे. गाण्याचे शूटिंग पूर्ण केल्यानंतर तो त्याच्या दबंग रिलोडेड शोसाठी दुबईला जाणार आहे. सिकंदरची निर्मिती साजिद नाडियादवाला यांनी केली आहे आणि यात सुनील शेट्टी आणि काजल अग्रवाल सारखे कलाकार देखील महत्त्वाच्या भूमिकेत आहेत. पुढील वर्षी ईदच्या मुहूर्तावर हा चित्रपट चित्रपटगृहांमध्ये प्रदर्शित होणार आहे.

हॉटेलचे किल्ल्यामध्ये रूपांतर झाले

फलकनुमा पॅलेस हॉटेलचे सलमानसाठी 'किल्ला' बनवण्यात आल्याचे अहवालात म्हटले आहे. 'शूटसाठी तीन स्टँडिंग सेट आहेत, त्यापैकी दोन शहरात आहेत, पण मुख्य लोकेशन पॅलेस हॉटेलच आहे.' सलमान हॉटेलच्या एका भागात शूटिंग करत असला तरी प्रोडक्शन टीमने संपूर्ण हॉटेलमध्ये आणि आजूबाजूला सुरक्षा कर्मचारी तैनात केले आहेत.